Skip to content

Probleme me internetin dhe PlayStation në Zvicër, dyshohet për ndikimin e GTA 6

(KEYSTONE/Michael Schmid)

Problemet u shfaqën në një moment kur miliona lojtarë në mbarë botën po përgatiteshin për lansimin e GTA 6, një prej videolojërave më të shumëpritura të viteve të fundit

Lansimi i shumëpritur i videolojës Grand Theft Auto VI (GTA 6) është shoqëruar me probleme teknike në shërbimet digjitale. Në Zvicër janë raportuar ndërprerje dhe vështirësi në përdorimin e shërbimeve të Salt, Swisscom dhe PlayStation, ndërsa ende nuk është konfirmuar nëse këto probleme lidhen drejtpërdrejt me lojën e re.

Më 18 nëntor, përdorues të shumtë raportuan probleme me lidhjen në internet dhe shërbimet online. Sipas gazetës zvicerane 20 Minuten, raportimet përfshinin operatorët e telekomunikacionit Salt dhe Swisscom, si dhe platformën PlayStation Network, transmeton albinfo.ch.

Problemet u shfaqën në një moment kur miliona lojtarë në mbarë botën po përgatiteshin për lansimin e GTA 6, një prej videolojërave më të shumëpritura të viteve të fundit.

Ndërprerje të konsiderueshme u regjistruan veçanërisht në PlayStation Network, ku përdoruesit raportuan vështirësi gjatë kyçjes në llogaritë e tyre, lidhjes me serverët dhe përdorimit të funksioneve online.

Sony konfirmoi se disa shërbime të PlayStation kishin probleme teknike dhe njoftoi se po punonte për zgjidhjen e tyre. Sipas raportimeve të publikuara më vonë gjatë ditës, shërbimet ishin rikthyer në funksionim normal.

GTA 6 kishte rritur ndjeshëm trafikun e internetit në Zvicër

Interesimi i jashtëzakonshëm për videolojën kishte ndikuar në trafikun e internetit në Zvicër edhe përpara lansimit zyrtar.

Sipas të dhënave të publikuara nga agjencia Keystone-SDA, operatori Sunrise kishte regjistruar një rritje deri në tetëfish të trafikut të shkarkimeve gjatë orëve të para kur GTA 6 u bë e disponueshme për shkarkim paraprak.

Në nivel ditor, vëllimi i shkarkimeve ishte rreth 30 për qind më i lartë se zakonisht. Megjithatë, Sunrise kishte deklaruar se infrastruktura e tij e përballoi ngarkesën pa probleme.

Ndërkohë, Salt kishte raportuar vetëm rritje të kufizuara të trafikut, ndërsa Swisscom nuk kishte publikuar të dhëna specifike për ndikimin e lojës në rrjetin e tij. GTA 6 pritet të jetë një prej lansimeve më të mëdha në historinë e industrisë së videolojërave. Interesimi i jashtëzakonshëm për lojën ka nxitur miliona përdorues të përgatiten për ta shkarkuar dhe luajtur menjëherë pas publikimit.

Megjithatë, deri më tani nuk ka konfirmim zyrtar se problemet e raportuara te operatorët zviceranë dhe PlayStation kanë pasur një shkak të përbashkët apo janë shkaktuar drejtpërdrejt nga GTA 6.