Qeveria e Kosovës ka miratuar projektbuxhetin për vitin 2027, në vlerë prej 4.27 miliardë eurosh, i cili është proceduar për shqyrtim dhe miratim në Kuvend, përcjell albinfo.ch.
Buxheti i paraparë për vitin e ardhshëm është 300 milionë euro më i lartë se buxheti bazë i vitit 2026 dhe 200 milionë euro më i lartë se buxheti i rishikuar i këtij viti.
Gjatë mbledhjes së Qeverisë, kryeministri Albin Kurti ka deklaruar se ekonomia e Kosovës ka shënuar rritje prej 5.4 për qind në tremujorin e parë dhe 4.1 për qind në tremujorin e dytë të vitit 2026.
Sipas tij, këto rezultate e rendisin Kosovën ndër vendet me rritjen më të shpejtë ekonomike në rajon dhe më gjerë.
“Për vitin 2027 buxheti i projektuar është 4.27 miliardë euro. Është për 200 milionë euro më i lartë se buxheti i rishikuar i vitit 2026 dhe për 300 milionë euro më i lartë sesa buxheti bazë i vitit 2026”, ka deklaruar Kurti.
Ai ka bërë të ditur se nga ky buxhet, 908 milionë euro janë paraparë për komunat, duke e cilësuar këtë si një shumë rekord.
Projektbuxheti për vitin 2027 parasheh gjithashtu pagesën e pagës së 13-të për punonjësit që paguhen nga buxheti i shtetit.
Ndërkohë, nga 1 korriku 2027 është paraparë rritja e koeficientit të pagave në 120 euro.
“Pra, pjesa e parë e vitit do të jetë me pagë të 13-të e pjesën e dytë të vitit do të ketë rritje page për të gjithë nëpunësit që marrin paga nga buxheti. Kjo e çon buxhetin e pagave në 1 miliard e 85 milionë euro”, ka thënë Kurti.
Pas miratimit nga Qeveria, projektbuxheti është proceduar në Kuvendin e Kosovës, ku pritet të shqyrtohet nga deputetët.
