Dënohet me burg të përjetshëm turku që vrau kosovaren 8 vjeçare

Sipas bashkëvuajtësve të tij në burg, të cilëve ai ua ka besuar informatën për vrasjen e Jenisës, ai kishte thënë se vrasjen e kishte bërë nga “urrejtja për shqiptarët”

Turko –gjermani I.B. është dënuar me burgim të përjetshëm nga gjykata e qarkut e  Hanoverit në Gjermani, pasi kishte vrarë në mënyrë të përsëritur dy fëmijë romë, që të dy me prejardhje nga Kosova.

Drejtësia u vonua, por në fund zbardhi gjithçka. Vrasësi i Jenisa. M., 8 vjeçare e cila në vitin 2007  u ekzekutua  dhe kufoma e saj u zhduk për shtatë vite pa asnjë gjurmë, në fund mori dënimin e merituar. I.B. u dënua me burg të përjetshëm nga gjyqi i qarkut të Hanoverit,  shkruajnë mediet gjermane

Gjykata gjeti fajtor personin 44 vjeçar, i cili kishte vrarë një fëmijë në vitin 2007 që ishte mbesa e ish të dashurës së tij. Shkak për këtë ishin grindjet më familjen e ish të dashurës: “Ai ka vendosur që familjen ta përmbytë në fatkeqësi, në dëshpërim”, thotë gjyqtari kryesues Wolfgang Rosenbusch, përcjell “albinfo.ch”.

Burri është dënuar tashmë me burgim të përjetshëm për shkak se ai kishte vrarë edhe një fëmijë tjetër, Dano nga Herfordi.

Që kur Jenisa u zhduk, familja dhe hetuesit e kishin në shënjestër të dënuarin. Në atë kohë ai  u lirua nga paraburgimi sepse policia nuk gjeti prova për të. Kufoma e Jenisës ishte zhdukur.

Vetëm pasi I.B. u arrestua vitin e kaluar në Borghorst për vrasjen e fëmijës tjetër, pesëvjeçarit Dano, hetuesit arritën të zbulojnë edhe për vrasjen e Jenisës.

Me sa duket i akuzuari në besim u ka treguar disa të burgosurve se si i kishte vrarë Danon dhe Jenisën ndërsa gjatë rrëfimit të tij ai kishte treguar se edhe ku e ka fshehur vajzën e vdekur. Të burgosurit kishin informuar gjyqësorin. Në vitin 2014 gjendet përfundimisht skeleti i Jenisës.

Por çfarë e shtyri të dënuarin të bëj këtë akt? Siç thuhet ai si turk është ndier gjithmonë i fyer nga familja rome me prejardhje nga Kosova. Madje, sipas bashkëvuajtësve të tij në burg, të cilëve ai ua ka besuar informatën për vrasjen e Jenisës, ai kishte thënë se vrasjen e kishte bërë nga “urrejtja për shqiptarët”, kanë shkruar mediet gjermane. Fjala është për atë se familjarët e Jenisës  janë romë nga Kosova që flasin shqip Edhe Dano ishte vrarë në shenjë hakmarrje, sepse fëmija gjithashtu i përkiste grupit etnik të romëve të Kosovës.