Pesë propozime për frenimin e rritjes së primeve shëndetësore në Zvicër

(KEYSTONE/Christian Beutler)

Rritja e vazhdueshme e kostove të shëndetësisë ka nxitur qytetarët zviceranë të propozojnë masa për frenimin e primeve të sigurimit shëndetësor. Pesë prej këtyre ideve janë vlerësuar nga ekspertë të fushës.

Pas njoftimit se primet e sigurimit shëndetësor në Zvicër do të rriten sërish vitin e ardhshëm, qytetarëve iu kërkua të propozonin zgjidhje për uljen e kostove.

Një nga idetë është shtetëzimi i sigurimeve shëndetësore, me argumentin se një sistem publik do të kishte më pak shpenzime administrative. Ekspertët, megjithatë, theksojnë se kostot administrative të sigurimeve bazë janë relativisht të ulëta dhe se rritja e shpenzimeve lidhet kryesisht me kostot më të larta të trajtimit, përparimet mjekësore dhe përdorimin në rritje të shërbimeve.

Një tjetër propozim është rritja e investimeve në parandalim dhe promovimin e shëndetit, përmes masave kundër konsumit të tepërt të sheqerit dhe produkteve ultra të përpunuara, si dhe promovimit të aktivitetit fizik. Sipas ekspertëve, kjo nuk do të ulte menjëherë primet, por mund të ndihmonte në reduktimin e sëmundjeve dhe kostove në planin afatgjatë.

Qytetarët kanë propozuar gjithashtu forcimin e mjekësisë familjare dhe kufizimin e numrit dhe kostove të specialistëve. Ekspertët e konsiderojnë më të arsyeshëm kontrollin e numrit të shërbimeve dhe çmimeve të tyre, në mënyrë që të frenohet rritja e shpenzimeve.

Një ide tjetër është që primet të përcaktohen sipas të ardhurave të qytetarëve. Kjo do ta shpërndante barrën financiare në mënyrë më të barabartë, por sipas ekspertëve nuk do të ulte domosdoshmërisht kostot e përgjithshme të sistemit shëndetësor.

Në fokus është edhe rishikimi i listës së shërbimeve që mbulohen nga sigurimi shëndetësor. Ekspertët propozojnë që këto shërbime të kontrollohen rregullisht për efektivitet, domosdoshmëri dhe kosto. Sipas të dhënave të autoriteteve shëndetësore zvicerane, kontrollet e deritanishme kanë sjellë kursime prej rreth 150 milionë frangash në vit.

Ekspertët vlerësojnë se nuk ka një masë të vetme që mund ta zgjidhë problemin e rritjes së kostove. Një kombinim i kontrollit të çmimeve dhe shërbimeve, parandalimit të sëmundjeve dhe një financimi më të drejtë mund të ndihmojë në frenimin e rritjes së primeve në të ardhmen.