Lisa Stoll në Shqipëri: Alphorni zviceran takon polifoninë shqiptare

SRF ka emetuar një kronikë të mrekullueshme për instrumentisten zvicerane dhe takimin e saj me artistët e polifonisë shqiptare në jug të Shqipërisë

Lisa Stoll udhëton për në Shqipëri dhe takon traditën shekullore të iso-polifonisë. Muzika hap zemrat dhe lidh brezat. Alphorn-istja më e njohur e Zvicrës përjeton mikpritjen shqiptare nga afër.

Transmetuesi publik i Zvicrës SRF ka emetuar pak ditë më parë një kronikë të mrekullueshme për instrumentisten zvicerane dhe takimin e saj me artistë popullorë shqiptarë në jugun e vendit, më saktë në fshatin Pilur të Himarës.

Mikpritja që has ajo në Shqipëri është shumë mbresëlënëse dhe e shoqëron në çdo hap që bën. Është interesant përshkrimi që autorët e kronikës i bëjnë kësaj vizite dhe shkrirjes së kufijve mes vendeve dhe mentaliteteve falë muzikës, artit.

Udhëtimi i Lisa Stoll e çon atë nga Tirana në Rivierën Shqiptare – në një vend ku iso-polifonia është kultivuar për breza dhe është një Vend i Trashëgimisë Botërore të UNESCO-s, transmeton albinfo.ch.

Shpejt bëhet e qartë: edhe pse alphorn-i dhe këndimi koral shqiptar tingëllojnë krejtësisht të ndryshëm, ato ndajnë më shumë sesa mund të pritet. Alphorn-i, me tonet e tij natyrore, është mjaft i kufizuar. E megjithatë, Lisa Stoll gjen mënyra për të kombinuar këta tinguj alpinë zviceranë me këndimin shqiptar. Së bashku me këngëtaren Eleni Merkuri, Lisa zhytet në botën magjepsëse të polifonisë shqiptare.

Në fshatin malor të Pilurit, ajo përjeton se si kjo traditë unike e këndimit kalohet nga brezi në brez dhe mbetet një pjesë integrale e jetës kulturore sot.

Në festivalin e përbashkët në Himarë, alphorn-i dhe iso-polifonia më në fund bashkohen. Në sfondin marramendës të detit, shpaloset një përvojë unike muzikore, duke demonstruar se muzika nuk njeh kufij – vetëm njerëz të gatshëm të dëgjojnë njëri-tjetrin.

Linku:

https://www.srf.ch/play/tv/stubete-around-the-world-mit-audiodeskription/video/lisa-stoll-in-albanien-alphorn-trifft-archaischen-gesang—mit-audiodeskription-folge-4?urn=urn:srf:video:968e5ce8-a88d-40dd-b564-48e541c75500

 

---