Gjermani, 15-vjeçari kosovar hetohet për vjedhjen e dy skuterëve elektrikë

Skuterët u lokalizuan përmes një aplikacioni gjurmimi, ndërsa policia gjeti tre adoleshentë duke i çmontuar me mjete pune.

Policia në Kempten të Gjermanisë ka nisur hetimet ndaj tre adoleshentëve, të dyshuar për vjedhjen e dy skuterëve elektrikë pranë një shkolle. Në mesin e të dyshuarve ndodhet edhe një 15-vjeçar me shtetësi kosovare, transmeton albinfo.ch.

Rasti është raportuar të martën, më 29 shtator, në Reichlinstraße të Kemptenit, ku dy skuterët elektrikë dyshohet se janë marrë brenda një intervali prej rreth një ore.

Pas vjedhjes, pronarët kanë përdorur një aplikacion gjurmimi për të përcaktuar vendndodhjen e mjeteve dhe më pas kanë njoftuar policinë. Ata, së bashku me një patrullë policore, kanë shkuar në lokacionin e treguar nga sistemi i gjurmimit.

Sipas policisë, në atë vend janë gjetur disa adoleshentë, të cilët dyshohet se po i çmontonin skuterët elektrikë duke përdorur mjete pune. Mes tyre ishte edhe 15-vjeçari kosovar.

Dy skuterët janë sekuestruar nga policia dhe më pas u janë kthyer pronarëve. Në kuadër të hetimeve, zyrtarët policorë kanë konfiskuar edhe telefonat celularë të të rinjve.

Stacioni Policor i Kemptenit po vazhdon hetimet ndaj tre adoleshentëve nën dyshimin për vjedhje./Albinfo.ch

---