Von der Leyen sot në Kosovë, nis takimet me krerët shtetërorë

Presidentja e Komisionit Evropian, Ursula von der Leyen, do të zhvillojë gjatë ditës takime me ushtruesen e detyrës së presidentes, Albulena Haxhiu, dhe kryeministrin Albin Kurti

Presidentja e Komisionit Evropian, Ursula von der Leyen, do ta vazhdojë sot në Kosovë vizitën e saj në vendet e Ballkanit Perëndimor, përcjell albinfo.ch.

Pas qëndrimit të djeshëm në Shqipëri, von der Leyen do të zhvillojë gjatë ditës takime me krerët institucionalë të Kosovës, me fokus në procesin e integrimit evropian dhe bashkëpunimin ndërmjet Kosovës dhe Bashkimit Evropian.

Takimi i parë është paraparë me ushtruesen e detyrës së presidentes së Kosovës, Albulena Haxhiu. Sipas njoftimit për media, takimi von der Leyen-Haxhiu do të nisë në orën 12:30 në ambientet e Presidencës së Kosovës.

Gjatë vizitës, presidentja e Komisionit Evropian pritet të takohet edhe me kryeministrin Albin Kurti.

Në fokus të vizitës janë rruga e integrimit evropian të vendeve të Ballkanit Perëndimor, reformat e nevojshme në këtë proces, si dhe zbatimi i Planit të Rritjes të Bashkimit Evropian për rajonin.

Vizita e von der Leyen zhvillohet në kuadër të një turneu në vendet e Ballkanit Perëndimor, përmes të cilit Bashkimi Evropian synon të riafirmojë mbështetjen për procesin e integrimit evropian dhe për zhvillimin ekonomik të rajonit./Albinfo.ch

---