Maqedoni e Veriut: Vazhdon masa për uljen e TVSH-së për naftën

(KEYSTONE/Michael Schmid)

Qeveria në Maqedoni të Veriut ka vazhduar masën për uljen e Tatimit mbi Vlerën e Shtuar për naftën, duke e mbajtur normën në 10 për qind, në vend të 18 për qind, deri më 12 tetor 2026.

Lajmin e ka konfirmuar ministrja e Financave, Gordana Dimitrieska-Koçoska, e cila tha se masa synon të ndikojë drejtpërdrejt në çmimet me pakicë të karburanteve dhe të kufizojë ndikimin e rritjes së çmimeve në tregjet ndërkombëtare.

“Me vazhdimin e kësaj mase ndikojmë drejtpërdrejt në çmimet me pakicë të karburanteve dhe kufizojmë bartjen e presioneve të jashtme të çmimeve te çmimet e produkteve dhe shërbimeve të tjera”, deklaroi ajo, shkruan ina, përcjell albinfo.ch.

Ajo ka deklaruar se Qeveria po ndjek zhvillimet në tregjet ndërkombëtare dhe po ndërmerr masa kur është e nevojshme, me qëllim të mbrojtjes së standardit të qytetarëve dhe ruajtjes së stabilitetit të ekonomisë vendase.