Kallas takon përfaqësuesit e Ballkanit Perëndimor në Nju-Jork, pjesë e takimit Kurti dhe Gjuriq

Në takimin joformal, ku morën pjesë përfaqësues të gjashtë vendeve të Ballkanit Perëndimor, u diskutua për stabilitetin rajonal.

Përfaqësues të vendeve të Ballkanit Perëndimor kanë zhvilluar një takim joformal me përfaqësuesen e lartë të Bashkimit Evropian për Punët e Jashtme dhe Politikën e Sigurisë, Kaja Kallas, në Nju-Jork, përcjell albinfo.ch.

Në takim morën pjesë kryeministri i Kosovës, Albin Kurti; ministri për Evropën dhe Punët e Jashtme i Shqipërisë, Ferit Hoxha; kryeministri i Maqedonisë së Veriut, Hristijan Mickoski; presidenti i Malit të Zi, Jakov Milatoviq; ministri i Punëve të Jashtme i Serbisë, Marko Gjuriq; si dhe ministri i Punëve të Jashtme i Bosnjë dhe Hercegovinës, Dino Konakoviq.

Për takimin ka njoftuar Ministria e Punëve të Jashtme e Bosnjë dhe Hercegovinës, e cila ka bërë të ditur se diskutimet janë përqendruar te çështjet që lidhen me stabilitetin rajonal.

Takimi është zhvilluar në kuadër të angazhimeve të përfaqësuesve të vendeve të Ballkanit Perëndimor dhe institucioneve të Bashkimit Evropian në Nju-Jork./Albinfo.ch

---