Në Hamburg paralajmërohet protestë në mbështetje të ish-krerëve të UÇK-së

Tubimi me moton “Liria ka emër – UÇK” është paralajmëruar për 26 shtator në qendër të Hamburgut.

Një protestë në mbështetje të ish-pjesëtarëve të Ushtrisë Çlirimtare të Kosovës është paralajmëruar të mbahet më 26 shtator në Hamburg të Gjermanisë, transmeton albinfo.ch.

Sipas njoftimit të organizatorëve, protesta me moton “Liria ka emër – UÇK” do të mbahet nga ora 16:00 deri në 18:00, në Rathausmarkt 1, në Hamburg.

Organizatorët e kanë cilësuar tubimin si protestë “kundër padrejtësisë ndaj çlirimtarëve” dhe u kanë bërë thirrje bashkatdhetarëve që t’i bashkohen protestës.

Protesta në Hamburg vjen në kuadër të tubimeve të paralajmëruara nga komunitetet shqiptare në disa qytete të Evropës më 26 dhe 27 shtator, në mbështetje të ish-krerëve të UÇK-së që po përballen me proces gjyqësor në Hagë.

Aktualisht, në disa vende evropiane janë paralajmëruar aktivitete dhe protesta të komunitetit shqiptar lidhur me këtë çështje./Albinfo.ch

 

---