Arrestime në Hagë, policia holandeze përdor edhe qentë ndaj protestuesve shqiptarë

Tensione në Hagë: Arrestohen protestues shqiptarë, policia përdor qentë

Pas shpalljes së aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit në Hagë, janë shënuar tensione mes protestuesve shqiptarë dhe policisë holandeze, raporton albinfo.ch.

Në pamjet e publikuara nga vendi i ngjarjes shihen pjesëtarë të policisë holandeze duke ndërhyrë ndaj protestuesve, ndërsa raportohet edhe për arrestime të disa prej tyre.

Për shpërndarjen e turmës, në terren janë parë edhe qen policorë, të cilët janë përdorur gjatë ndërhyrjes së autoriteteve.

Tensionet u përshkallëzuan pasi protestuesit, të mbledhur në mbështetje të ish-krerëve të UÇK-së, reaguan pas shpalljes së aktgjykimit nga Dhomat e Specializuara të Kosovës.

Sipas Reuters, në Hagë pati përleshje të shkurtra mes disa qindra mbështetësve të Hashim Thaçit dhe policisë, pasi protestuesit tentuan të marshonin drejt objektit të gjykatës.

Më herët, në pamje nga vendi i ngjarjes janë parë edhe protestues duke hipur mbi një kombi të policisë holandeze, në një situatë të tensionuar pranë objektit të Gjykatës Speciale.

Ndërkohë, autoritetet holandeze kishin paralajmëruar paraprakisht për masa të shtuara sigurie në Hagë gjatë ditës së shpalljes së aktgjykimit. /Albinfo.ch

---