Smith: Çështja nuk ka të bëjë me legjitimitetin e UÇK-së

Kryetari i trupit gjykues në rastin ndaj ish-krerëve të UÇK-së, Charles Smith, ka deklaruar në hapje të seancës se procesi gjyqësor nuk ka të bëjë me legjitimitetin e Ushtrisë Çlirimtare të Kosovës apo me synimin e saj për një Kosovë të pavarur. raporton albinfo.ch.

Smith ka theksuar se fokusi i gjykimit është te faktet dhe rrethanat që lidhen me akuzat ndaj Hashim Thaçit, Kadri Veselit, Jakup Krasniqit dhe Rexhep Selimit, si dhe te veprimet dhe sjellja e tyre individuale, raporton albinfo.ch.

“Ka të bëjë me veprimet dhe sjelljen e të akuzuarve. Ka të bëjë vetëm me fakte dhe rrethana që lidhen me akuzat kundër të akuzuarve”, ka deklaruar Smith.

Ai ka theksuar gjithashtu se çështja nuk ka të bëjë me vlerësimin e përgjegjësive të palëve në konflikt, me krimet e kryera nga forcat dhe paramilitarët serbë kundër shqiptarëve të Kosovës apo me pretendimet për vetëmbrojtje.

“Kjo çështje s’ka të bëjë me legjitimitetin e UÇK-së dhe synimin e saj për një Kosovë të pavarur. Nuk ka të bëjë me vlerësimin e përgjegjësive të njërës palë kundër palës tjetër. Nuk ka të bëjë me krime që forcat dhe paramilitarët serbë kanë kryer kundër shqiptarëve të Kosovës. Kjo çështje s’ka të bëjë me kurrfarë pretendimi për vetëmbrojtje”, ka thënë ai.

Deklaratat e Smithit u bënë në nisje të seancës ku pritet të shpallet aktgjykimi ndaj katër ish-krerëve të UÇK-së në Hagë.

/Albinfo.ch

---