NATO: KFOR-i mbetet i gatshëm për çdo skenar sigurie në Kosovë

Këshilli i Atlantikut të Veriut diskutoi me komandantin e KFOR-it për situatën e sigurisë dhe optimizimin gradual të pranisë së misionit në Kosovë

Këshilli i Atlantikut të Veriut i NATO-s u mblodh më 15 shtator në formatin KFOR, së bashku me vendet partnere që kontribuojnë me trupa, për të diskutuar me komandantin e KFOR-it, gjeneralmajorin turk Özkan Ulutaş, për situatën e sigurisë në Kosovë, përcjell albinfo.ch.

Gjatë raportimit të tij të fundit para Këshillit, Ulutaş dha një përditësim mbi angazhimin e vazhdueshëm të KFOR-it për ruajtjen e një mjedisi të sigurt dhe të qetë për të gjithë njerëzit që jetojnë në Kosovë, si dhe për garantimin e lirisë së lëvizjes.

Sipas NATO-s, KFOR-i vazhdon ta zbatojë mandatin e tij në bazë të Rezolutës 1244 të Këshillit të Sigurimit të Kombeve të Bashkuara, në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse në çështjet e sigurisë.

Në takim u diskutua edhe procesi i optimizimit të pranisë së KFOR-it, i cili vjen pas përmirësimit të vazhdueshëm të situatës së sigurisë në Kosovë.

NATO thekson se ky proces synon që misioni të mbetet i përshtatshëm për nevojat e sigurisë në terren.

“Procesi i optimizimit bazohet në kushtet në terren, po zbatohet gradualisht dhe do të jetë plotësisht i kthyeshëm, nëse zhvillimet përkatëse të sigurisë e kërkojnë këtë”, thuhet në njoftimin e NATO-s.

Aleanca thekson se KFOR-i do të vazhdojë të ketë personel, pajisje, trajnim dhe organizim të përshtatshëm për zbatimin e mandatit të tij afatgjatë të OKB-së.

NATO ka përsëritur gjithashtu përkushtimin e saj ndaj sigurisë së qëndrueshme në Kosovë dhe stabilitetit në Ballkanin Perëndimor, ndërsa ka theksuar rëndësinë e dialogut të ndërmjetësuar nga Bashkimi Evropian për normalizimin e marrëdhënieve ndërmjet Prishtinës dhe Beogradit.

“Dialogu i ndërmjetësuar nga BE-ja mbetet korniza për zgjidhjen e çështjeve të hapura, duke respektuar të drejtat e të gjitha komuniteteve”, thuhet në njoftim.

Gjeneralmajori Özkan Ulutaş pritet ta përfundojë mandatin e tij të dytë në krye të KFOR-it në mesin e tetorit. Në këtë pozitë do ta pasojë gjeneralmajori italian Roberto Vergori./Albinfo.ch

---