Një shtetas austriak gjendet pa shenja jete në Klinë

Rasti është raportuar rreth orës 02:35 të së martës, pasi një familjar kishte njoftuar se viktima nuk ishte lajmëruar në telefon që nga dita e kaluar

Shtetasi austriak R. Rainer, i lindur në vitin 1985, është gjetur pa shenja jete në lumin Drin, në afërsi të Klinës.

Burime të Gazetës Online Reporteri.net bëjnë të ditur se ai dyshohet se kishte dalë për të zënë peshk, ndërsa më pas ishte raportuar i zhdukur.

Lajmin për Reporteri.net e ka konfirmuar edhe Policia e Kosovës.

Sipas zëdhënësit të Policisë për Rajonin e Pejës, Driton Rugova, rasti është raportuar rreth orës 02:35 të së martës, pasi një familjar kishte njoftuar se viktima nuk ishte lajmëruar në telefon që nga dita e kaluar, transmeton albinfo.ch.

Ai ka bërë të ditur se njësitet policore kanë ndërmarrë menjëherë veprimet për kërkimin e personit të zhdukur.

“Pas një pune intensive të njësive policore, sot rreth orës 10:10, personi i zhdukur është gjetur në fshatin Zajm-Klinë, i cili ishte pa shenja jete. Këtë e ka konstatuar ekipi mjekësor”, tha Rugova.

Në vendin e ngjarjes kanë dalë hetuesit nga Sektori Rajonal për Hetime i Drejtorisë Rajonale të Policisë në Pejë, si dhe prokurori i shtetit.

Me urdhër të prokurorit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Rasti është cilësuar si “Hetim i vdekjes”.

---