Gjithnjë e më shumë fëmijë në Zvicër shkojnë te mjeku për probleme të lidhura me shkollën

Problemet që fëmijët përjetojnë në shkollë po zënë një pjesë gjithnjë e më të madhe të punës së pediatërve në Zvicër. Një studim i gfs.bern, i porositur nga Stiftung Mercator Schweiz, ka përfshirë 469 pediatër dhe 17 intervista me ekspertë të arsimit, psikologjisë dhe mjekësisë

Një studim i ri tregon se vështirësitë në shkollë po shndërrohen gjithnjë e më shumë në çështje shëndetësore, ndërsa pediatrit kërkojnë që zgjidhjet të fillojnë më herët në sistemin arsimor

Problemet që fëmijët përjetojnë në shkollë po zënë një pjesë gjithnjë e më të madhe të punës së pediatërve në Zvicër. Një studim i gfs.bern, i porositur nga Stiftung Mercator Schweiz, ka përfshirë 469 pediatër dhe 17 intervista me ekspertë të arsimit, psikologjisë dhe mjekësisë, transmeton albinfo.ch.

Rezultatet tregojnë se 44% e pediatërve përballen të paktën një herë në ditë me probleme të lidhura me shkollën si arsye për konsultim. Ndërkohë, 89% e mjekëve që trajtojnë raste të tilla thonë se ato janë shtuar gjatë karrierës së tyre.

Simptomat ndryshojnë në varësi të moshës. Te fëmijët më të vegjël shfaqen më shpesh dhimbje barku, probleme me sjelljen dhe vështirësi në përqendrim. Situata bëhet më serioze në shkollën e mesme. Sipas pediatërve që trajtojnë nxënësit e klasave 7–9, 75% hasin shpesh gjendje depresive, 58% çrregullime të të ngrënit, 54% vetëlëndim dhe 51% mendime për vetëvrasje të lidhura me problemet shkollore.

Megjithatë, ekspertët theksojnë se kjo nuk do të thotë se shkolla në vetvete i sëmur fëmijët. Faktorët më të shpeshtë përfshijnë bullizmin dhe përjashtimin social, mospërputhjen ndërmjet kërkesave mësimore dhe aftësive të fëmijës, presionin për rezultate dhe marrëdhëniet problematike me mësuesit.

Veçanërisht shqetësuese konsiderohet marrëdhënia nxënës–mësues: 70% e pediatërve e identifikojnë shpesh një marrëdhënie të tensionuar me mësuesin si shkak të problemeve, ndërsa 60% përmendin ndryshimet e shpeshta të mësuesve.

Raporti rekomandon që mbështetja të ofrohet para se problemet të bëhen aq serioze sa të kërkojnë diagnozë mjekësore. Ndër masat e propozuara janë ulja e presionit për rezultate, përshtatja më e mirë e mësimit me zhvillimin e fëmijëve, stabiliteti më i madh i stafit mësimor dhe bashkëpunimi më i hershëm mes shkollave, prindërve, pediatërve dhe psikologëve.

---