Ministri Rösti heq termat mbi ndryshimet klimatike nga tekstet zyrtare

Ish zyrtarë të deprtamentit thonë se sekretari i Rostit kishte lëshuar udhëzime për të përshtatur tekstet ku përmendet "ndryshimi i klimës"

Terma të tillë të pranishëm gjithandej si “ndryshimi i klimës” dhe “ngrohja globale” u hoqën pjesërisht nga tekstet zyrtare nën Këshilltarin Federal Albert Rösti (SVP), i cili mbulon resorin përkatës në Qeverinë e Zvicrës.

Sipas disa burimeve brenda administratës federale, pasi Rösti mori detyrën, ai dhe Sekretari i tij i Përgjithshëm, Yves Bichsel, ndoqën një qëndrim skeptik ndaj klimës, transmeton albinfo.ch. Termi “biodiversitet” thuhet se u konsiderua gjithashtu i padëshirueshëm në udhëzimet e brendshme.

Peter Füglistaler, ish-drejtori i Zyrës Federale të Transportit, i konfirmoi gazetës “SonntagsBlick”, se Bichsel kishte lëshuar udhëzime për të përshtatur tekstet që përmbajnë fjalën “ndryshimi i klimës”.

Dokumentet e brendshme nga Zyra Federale për Zhvillimin Hapësinor zbuluan gjithashtu përpjekje për të shmangur terma të tillë. Për shembull, një zyrtar i lartë sugjeroi fshirjen e një fraze “për të shmangur përdorimin e fjalëve të diskutueshme”.

Zëdhënësja e Rösti-t, Franziska Ingold, mohoi çdo ndalim të termit dhe theksoi se Departamenti Federal i Mjedisit, Transportit, Energjisë dhe Komunikacionit (DETEC) vazhdon të përdorë termat në fjalë.

 

---