Gjashtë federata konfirmojnë mbështetjen për Infantinon

Presidenti i FIFA-s, Gianni Infantino, ka marrë një tjetër mbështetje në prag të zgjedhjeve të ardhshme presidenciale të organizatës. Federatat e futbollit të Katarit, Marokut, Egjiptit, Libanit, Sudanit dhe Mauritanisë kanë deklaruar publikisht se qëndrojnë pas drejtimit të tij.

Mbështetja vjen në një periudhë të ndërlikuar për Infantinon, i cili është përballur me kritika lidhur me një projekt investimi privat që synonte ristrukturimin e të drejtave komerciale të disa garave të FIFA-s.

Në një deklaratë të përbashkët, gjashtë federatat arabe vlerësuan punën e Infantinos dhe angazhimin e tij për zhvillimin e futbollit në të gjitha rajonet e botës. Sipas tyre, futbolli ka një rol të rëndësishëm në afrimin e njerëzve dhe në forcimin e bashkëpunimit mes federatave.

Katër prej federatave që kanë firmosur deklaratën – Katari, Egjipti, Maroku dhe Mauritania – përfaqësohen gjithashtu në Këshillin e FIFA-s përmes drejtuesve të tyre.

Infantino pritet të garojë për një tjetër mandat në zgjedhjet presidenciale të FIFA-s, të cilat janë planifikuar për marsin e vitit të ardhshëm. Federatat arabe kanë shprehur gatishmërinë për të vazhduar bashkëpunimin me të, me synim zgjerimin e mundësive për zhvillimin e futbollit dhe rritjen e ndikimit të futbollit arab në arenën ndërkombëtare.

Në anën tjetër, presidenti i FIFA-s po përballet me kundërshtime nga UEFA, Konfederata Aziatike e Futbollit dhe CONCACAF lidhur me një plan investimi që parashihte shitjen e 20 për qind të të drejtave komerciale të disa kompeticioneve të FIFA-s te investitorët privatë. Projekti, që sipas planit do të gjeneronte rreth 4.2 miliardë dollarë, u tërhoq pas reagimeve të shumta negative.

Për zgjedhjet e ardhshme, Infantino do t’i nevojiten 106 vota për të siguruar shumicën e thjeshtë nëse në garë do të jetë vetëm një kundërshtar. Në rast se kandidojnë tre ose më shumë persona, për fitore në raundin e parë do të kërkohet shumicë prej dy të tretash, ose 141 vota