Shqipëria po përballet me zjarre

Situata po monitorohet në vijimësi, ndërsa puna në terren vazhdon për izolimin e plotë të vatrave

Vijon puna në terren për izolimin e dy vatrave të zjarrit në zonat e Panahorit dhe Vloshit, në Mallakastër të Shqipërisë.

Gjatë orëve të mëngjesit, zjarri paraqitet me intensitet disi më të ulët, ndërsa forcat zjarrfikëse dhe strukturat e angazhuara vijojnë ndërhyrjen për të parandaluar përhapjen e flakëve.

Situata po monitorohet në vijimësi, ndërsa puna në terren vazhdon për izolimin e plotë të vatrave.

Vendet e tjera

Një zjarr i përmasave të mëdha është aktivizuar në zonën ndërmjet fshatrave Andon Poçi dhe Hundëkuq, duke paraqitur rrezik për përhapjen e flakëve drejt zonave të banuara.

Zjarri është i ndarë në dy vatra aktive, me një perimetër të përgjithshëm rreth 4 km. Terreni i thyer dhe bimësia e dendur e bëjnë ndërhyrjen dhe afrimin e mjeteve zjarrfikëse tepër të vështirë.

Në të njëjtën zonë janë evidentuar edhe para një jave tre vatra zjarri.

I gjithë shërbimi zjarrfikës i Drejtorisë së MZSH-së Gjirokastër ndodhet në vendngjarje, duke ndërhyrë dhe monitoruar situatën në vazhdimësi.

Për përballimin e situatës dhe forcimin e operacionit, priten forca shtesë zjarrfikëse, zjarrfikës vullnetarë dhe Forcat e Armatosura, të cilat do të angazhohen në ndihmë të operacionit për vënien nën kontroll të zjarrit.

Situata vijon të jetë e vështirë dhe dinamike, ndërsa shërbimet zjarrfikëse po punojnë për të frenuar avancimin e flakëve dhe për të mbrojtur fshatrat e rrezikuara.

---