Zogu në motor anulon fluturimin nga Selaniku drejt Gjermanisë, 150 pasagjerë mbeten në aeroport

150 pasagjerë bllokohen në aeroportin e Selanikut

Një incident i pazakontë ka shkaktuar ndërprerje të operacioneve në aeroportin “Maqedonia” të Selanikut, pasi një fluturim me destinacion Gjermaninë u anulua për arsye sigurie, transmeton albinfo.ch.

Rreth 150 pasagjerë, të cilët ishin planifikuar të udhëtonin me këtë fluturim, u detyruan të prisnin për disa orë në aeroport, derisa kompania ajrore i njoftoi për anulimin e nisjes.

Sipas autoriteteve, gjatë kontrollit teknik të avionit para fluturimit u konstatua prania e një zogu në motor. Për shkak të rrezikut që paraqiste ky incident për sigurinë e fluturimit, ekipi teknik dhe autoritetet vendosën që avioni të mos ngrihej.

Menjëherë pas zbulimit të problemit, u aktivizuan procedurat standarde të sigurisë për largimin e zogut dhe kryerjen e një inspektimi të detajuar të motorit, në përputhje me protokollet e aviacionit civil.

Pasagjerët janë informuar se fluturimi drejt Gjermanisë do të realizohet gjatë ditës së sotme, pasi të përfundojnë të gjitha kontrollet teknike dhe avioni të shpallet i sigurt për fluturim. /Albinfo.ch

---