​Kosovë: Deputetëve iu dërgohen ftesat për seancën konstituive, ky është rendi i ditës

Ushtruesja e detyrës së presidentes së Kosovës dhe kryetarja në detyrë e Kuvendit, Albulena Haxhiu ua ka dërguar deputetëve të zgjedhur ftesat për seancën konstituive të Kuvendit.

Siç ishte caktuar ditë më parë, seanca konstituive do të mbahet të enjten në orën 10:00, teksa në ftesë është bashkëngjitur edhe rendi i ditës së asaj seance.

Si pikë e parë është formimi i Komisionit të përkohshëm për verifikimin e kuorumit dhe të mandateve të deputetëve, transmeton albinfo.ch.

Pas kësaj në rend dite është betimi i deputetëve dhe pika e tretë e seancës është zgjedhja e Kryetarit të Kuvendit, raporton kp. Pika e fundit është zgjedhja e nënkryetarëve të Kuvendit, raporton kp.

Kryetari i Kuvendit propozohet nga grupi më i madh parlamentar, sipas nenit 67 dhe ai zgjidhet me shumicë të votave të të gjithë deputetëve (61 nga 120).

Deputetët duhet t’i zgjedhin edhe pesë nënkryetarë të Kuvendit, tre prej të cilëve propozohen nga tri grupet më të mëdha parlamentare, kurse dy nga komunitetet joshumicë.