Pas trazirave në Ceuta, Gjermania zgjat kontrollet kufitare

"Për të ruajtur sukseset e arritura deri më tani në frenimin e migrimit të paligjshëm, duhet të mbahen "kontrollet e kufijve të brendshëm fleksibël dhe të adaptuar"

Duke ju referuar hyrjes së dhjetëra mijëra refugjatëve në enklavën spanjolle të Afrikës Veriore, Ceuta, Ministri i Brendshëm i Gjermanisë, Alexander Dobrindt, synon të mbajë kontrollet në kufijtë tokësorë të Gjermanisë.

“Ne do ta zgjasim mundësinë e kontrolleve të kufijve të brendshëm përtej shtatorit”, njoftoi politikani i CSU-së, transmeton albinfo.ch. Për të ruajtur sukseset e arritura deri më tani në frenimin e migrimit të paligjshëm, duhet të mbahen “kontrollet e kufijve të brendshëm fleksibël dhe të adaptuar”, raporton dpa.de. Dobrindt nuk specifikoi se për sa kohë do të zgjateshin kontrollet.

Edhe pse kufijtë brenda BE-së supozohet të jenë të hapur, kontrollet janë rivendosur në të gjithë kufijtë e jashtëm të Gjermanisë që nga 16 shtatori 2024. Ministrja e Brendshme Federale e atëhershme, Nancy Faeser (SPD), e urdhëroi këtë me qëllim uljen e numrit të hyrjeve të paligjshme. Pavarësisht kritikave në rritje, rregullorja është zgjatur tre herë – së fundmi deri në mesin e shtatorit 2026.

“Situata në Ceuta ilustron natyrën e paqëndrueshme të migrimit të paligjshëm”, shpjegoi Dobrindt në lidhje me zgjatjen e rinovuar.

Sipas vlerësimeve të autoriteteve rajonale, rreth 60,000 migrantë kanë hyrë në enklavën spanjolle në mënyrë të parregullt nga Maroku ditët e fundit.

---