Fisnik Asllani ende pa vendim për të ardhmen, pret një sinjal nga Barcelona

(KEYSTONE/DPA/Soeren Stache)

Sulmuesi kosovar Fisnik Asllani vazhdon të jetë në qendër të interesimit të disa klubeve evropiane, por deri tani nuk ka marrë një vendim përfundimtar për transferimin e tij të ardhshëm.

Sipas raportimeve të mediave spanjolle, RB Leipzig është një nga klubet që po synon afrimin e tij dhe ka shfaqur interes konkret për sulmuesin. Megjithatë, Asllani thuhet se ka kërkuar më shumë kohë, pasi shpreson për një mundësi të mundshme te gjiganti spanjoll, Barcelona.

Agjenti i futbollistit më herët ka konfirmuar se ka pasur kontakte me klubin katalanas, i cili është në kërkim të një sulmuesi të ri për të ardhmen, pas epokës së Robert Lewandowskit.

Barcelona raportohet se e ka ndjekur prej kohësh Asllanin dhe është impresionuar nga paraqitjet e tij. Trajneri Hansi Flick vlerëson veçanërisht aftësinë e tij për të finalizuar aksione me të dyja këmbët.

Sipas mediave spanjolle, një transferim te Barcelona mund të bëhet më i mundshëm nëse Ferran Torres largohet gjatë kësaj vere, por klubi katalanas mund të shqyrtojë një ofertë edhe në rast se sulmuesi spanjoll qëndron në skuadër.

Një tjetër faktor që e bën Asllanin një opsion interesant është klauzola e tij e lirimit prej 29 milionë eurosh, një shumë që mund ta bëjë atë një alternativë të favorshme në tregun e transferimeve, sidomos nëse Barcelona nuk arrin të sigurojë objektivin kryesor, Julian Alvarez.