Kryeministri në detyrë i Kosovës, Albin Kurti, ka pritur në ndërtesën e Qeverisë një grup vizitorësh që po qëndrojnë në Kosovë në kuadër të programit “Ethno Tour 2026”, të organizuar nga Janet Reineck, transmeton albinfo.ch.

Sipas Kurtit, grupi përbëhej nga pjesëmarrës të ardhur nga Kalifornia, Uashingtoni, Ishulli i Manit dhe Bullgaria, të cilët janë profesionistë në fusha të ndryshme, si inxhinieria mjedisore, planifikimi urban, shëndetësia, arsimi dhe teknologjia e informacionit.

Në një postim në Facebook, Kurti bëri të ditur se gjatë takimit u diskutua për një sërë temash që lidhen me zhvillimin e Kosovës, përfshirë të drejtat e njeriut, kulturën, arsimin, shërbimet për të moshuarit, bujqësinë dhe ekonominë.

Ai tha se një pjesë e bisedës iu kushtua edhe rolit të diasporës shqiptare, të cilën e cilësoi si një nga asetet më të rëndësishme të vendit.

“Si përherë kur takohem me miken time Janet Reineck, biseduam edhe për progresin në Kosovë dhe për mërgatën tonë të dashur, të cilët janë ambasadorët tanë masivë, duke ardhur gjithmonë në vendlindje dhe duke e promovuar atë”, u shpreh Kurti.

Kryeministri në detyrë theksoi gjithashtu se marrëdhëniet mes shqiptarëve dhe Shteteve të Bashkuara kanë rrënjë të hershme historike, duke kujtuar emigracionin e parë shqiptar në SHBA gjatë shekullit XIX, themelimin e Federatës Panshqiptare “Vatra” në vitin 1912, si dhe kontributin e personaliteteve si Presidenti Woodrow Wilson dhe Fan Noli në forcimin e lidhjeve ndërmjet dy popujve.

Në përfundim të takimit, Kurti u uroi mirëseardhje pjesëmarrësve të “Ethno Tour 2026”, duke i falënderuar për interesimin e tyre për Kosovën. /Albinfo.ch