Tragjedi në Gjermani: Pediatri i njohur gjendet i pajetë në banesë, arrestohet djali i tij nën dyshimin për vrasje

(KEYSTONE/DPA/David Inderlied)

Një ngjarje e rëndë ka tronditur qytetin e Dortmundit në Gjermani, ku një pediatër i njohur është gjetur i vdekur në shtëpinë e tij. Për rastin është arrestuar djali i viktimës, 41-vjeçar.

Policia ka zbuluar trupin e 78-vjeçarit Harald N. gjatë pasdites së së martës në vilën ku ai jetonte i vetëm. Gjatë hetimeve fillestare, dyshimet janë përqendruar te njëri prej djemve të tij, i cili më pas është paraqitur vetë në polici.

Sipas raportimeve të mediave gjermane, 41-vjeçari dyshohet se ka pranuar para autoriteteve se ka kryer vrasjen e babait të tij. Pas deklaratës së tij, ai është ndaluar nga policia.

Autoritetet po vazhdojnë hetimet për të zbardhur motivet dhe rrethanat e plota të ngjarjes. Ndërkohë, pritet që autopsia të përcaktojë shkakun e saktë të vdekjes së pediatrit. Prokuroria në Dortmund do të shqyrtojë masat e mëtejshme ligjore ndaj të dyshuarit.

Harald N. ishte një figurë e respektuar në komunitetin e Dortmundit. Pas humbjes së bashkëshortes së tij në vitin 2019, ai kishte jetuar i vetëm. Përveç punës së tij si mjek, ai ishte i njohur edhe për angazhimet humanitare, veçanërisht për mbështetjen ndaj familjeve të fëmijëve të prekur nga sëmundjet e rënda.

Banorët e zonës e kanë përshkruar atë si një njeri të dashur dhe të respektuar, duke shprehur tronditjen e tyre pas kësaj ngjarjeje të rëndë.