Ulje emergjente në Prishtinë, avioni i EasyJet dyshohet se u godit nga një shqiponjë

Fluturimi Prishtinë–Berlin u anulua pasi avioni u kthye në aeroport pak minuta pas ngritjes. Dyshohet se një zog hyri në njërin nga motorët.

Një fluturim i kompanisë EasyJet, i planifikuar nga Prishtina drejt Berlinit, është detyruar të kryejë ulje emergjente në Aeroportin Ndërkombëtar të Prishtinës, pasi dyshohet se një shqiponjë ka goditur njërin nga motorët e avionit menjëherë pas ngritjes, transmeton albinfo.ch. 

Sipas një pasagjeri që ndodhej në bord, shqiponja dyshohet se hyri në motor, duke shkaktuar dëmtim të turbinës. Pas incidentit, avioni qëndroi rreth 20 minuta në ajër, ndërsa ekuipazhi vendosi ta rikthente në mënyrë të sigurt në aeroportin e nisjes.

Avioni u ul pa incidente, ndërsa fluturimi drejt Berlinit u anulua.

Pasagjeri ka vlerësuar profesionalizmin e pilotit dhe ekuipazhit, duke theksuar se situata u menaxhua me qetësi dhe se ulja u realizua në mënyrë të sigurt.

Deri më tani, kompania EasyJet dhe Aeroporti Ndërkombëtar i Prishtinës nuk kanë dalë me një njoftim zyrtar lidhur me shkaqet e incidentit./Albinfo.ch 

---