Farmacistët paralajmërojnë: Disa barna mund të bëhen të rrezikshme gjatë valës së të nxehtit

Temperaturat e larta mund të rrisin efektet anësore ose të ulin efektivitetin e disa medikamenteve

Farmacistët në Zvicër u kanë bërë thirrje qytetarëve të tregojnë kujdes të shtuar me përdorimin e disa barnave gjatë valës së të nxehtit, pasi temperaturat e larta mund të ndryshojnë mënyrën se si ato veprojnë në organizëm. Sipas ekspertëve, disa medikamente mund të rrisin rrezikun e dehidratimit, goditjes nga nxehtësia ose problemeve të tjera shëndetësore, shkruan The Local, transmeton albinfo.ch.

Ndër barnat që kërkojnë kujdes të veçantë janë diuretikët, të cilët përdoren për trajtimin e tensionit të lartë dhe sëmundjeve të zemrës, pasi rrisin humbjen e lëngjeve nga organizmi.

Gjithashtu, disa ilaçe kundër depresionit, antipsikotikët dhe antihistaminikët mund të pengojnë aftësinë e trupit për t’u ftohur përmes djersitjes, duke rritur rrezikun e mbinxehjes.

Farmacistët theksojnë se pacientët nuk duhet të ndërpresin marrjen e barnave me iniciativën e tyre. Nëse shfaqen simptoma si marramendje, lodhje e pazakontë, të përziera ose konfuzion gjatë ditëve me vapë të madhe, rekomandohet të kontaktojnë mjekun ose farmacistin për këshilla.

Ekspertët kujtojnë gjithashtu se edhe mënyra e ruajtjes së medikamenteve është e rëndësishme. Shumë barna duhet të mbahen larg rrezeve të diellit dhe temperaturave të larta, pasi nxehtësia mund të ndikojë në cilësinë dhe efektivitetin e tyre.

Autoritetet shëndetësore u rekomandojnë qytetarëve të pinë mjaftueshëm ujë, të shmangin ekspozimin në diell gjatë orëve më të nxehta dhe të kontrollojnë rregullisht gjendjen e personave të moshuar dhe atyre me sëmundje kronike, të cilët janë më të rrezikuar gjatë valëve të të nxehtit.

---