Zvicër: Mësuesit kërkojnë pezullimin e mësimit gjatë vapës

Mësuesit kërkojnë masa kundër vapës në klasa: Mësimi të pezullohet kur temperatura kalon 30 gradë

Federata Zvicerane e Mësuesve (LCH) po kërkon vendosjen e standardeve të detyrueshme për mbrojtjen nga temperaturat e larta në shkollat publike, për shkak të valës së të nxehtit që ka përfshirë vendin dhe parashikohet të vazhdojë edhe në ditët në vijim, përcjell albinfo.ch.

Sipas federatës, qeveria federale duhet të hartojë, në bashkëpunim me kantonet, rregulla të qarta për mbrojtjen e nxënësve dhe stafit nga nxehtësia në ambientet shkollore.

LCH propozon që temperatura brenda klasave të mos kalojë 26 gradë Celsius. Nëse kjo kufi tejkalohet, mësimi duhet të zhvendoset në ambiente më të freskëta.

Ndërkaq, në rast se temperatura në klasa arrin ose tejkalon 30 gradë Celsius, federata kërkon që mësimi të pezullohet plotësisht, duke argumentuar se kushtet e tilla ndikojnë negativisht në shëndetin, përqendrimin dhe procesin e të nxënit të nxënësve dhe mësuesve. /Albinfo.ch

---