Valë të nxehti në Zvicër: Si ta mbani shtëpinë dhe veten të freskët gjatë temperaturave të larta

Gjithashtu, këshillohet kontrolli i rregullt i të afërmve të moshuar që jetojnë vetëm

Me temperaturat që shpesh kalojnë 30 gradë Celsius gjatë verës, ekspertët në Zvicër këshillojnë që qytetarët të marrin masa të thjeshta për të mbrojtur shëndetin dhe për të mbajtur banesat sa më të freskëta.

Valët e të nxehtit janë bërë më të shpeshta vitet e fundit, ndërsa autoritetet shëndetësore paralajmërojnë se ato paraqesin rrezik të veçantë për të moshuarit, fëmijët dhe personat me sëmundje kronike, transmeton albinfo.ch.

Një nga rekomandimet kryesore është mbajtja e dritareve dhe grilave të mbyllura gjatë orëve më të nxehta të ditës. Ajrosja e banesës duhet të bëhet herët në mëngjes ose gjatë natës, kur temperaturat jashtë janë më të ulëta. Po ashtu, mbyllja e perdeve ose grilave ndihmon në bllokimin e rrezeve të diellit dhe ul ngrohjen e ambienteve të brendshme.

Ekspertët këshillojnë gjithashtu të shmanget përdorimi i pajisjeve që prodhojnë nxehtësi, si furra, soba ose pajisjet elektrike që nuk janë të nevojshme. Në vend të gatimeve të rënda, rekomandohen ushqime të lehta dhe të freskëta.

Për t’u mbrojtur nga efektet e të nxehtit, autoritetet zvicerane rekomandojnë konsumimin e rregullt të ujit, shmangien e aktiviteteve fizike intensive gjatë mesditës dhe qëndrimin në hije sa herë që është e mundur.

Gjithashtu, këshillohet kontrolli i rregullt i të afërmve të moshuar që jetojnë vetëm.

Nëse temperatura në banesë bëhet e padurueshme, ekspertët sugjerojnë krijimin e një “dhome të freskët”, duke zgjedhur një hapësirë të errët dhe të mbrojtur nga dielli ku mund të qëndrohet gjatë orëve më të nxehta të ditës.

Sipas studimeve, vera e vitit 2022 ishte ndër më të nxehtat në historinë e Zvicrës dhe temperaturat e larta u lidhën me rritjen e numrit të vdekjeve, veçanërisht tek personat mbi 80 vjeç. Kjo është arsyeja pse autoritetet vazhdojnë të bëjnë thirrje për kujdes të shtuar gjatë periudhave të vapës ekstreme.

---