Lehtësim i mundshëm për mijëra persona të mbingarkuar me borxhe në Zvicër

(KEYSTONE/Gaetan Bally)

Qeveria zvicerane po përgatit një reformë që mund t’u ofrojë një mundësi të re personave të zhytur prej vitesh në borxhe. Sipas propozimit, njerëzit që ndodhen në mbingarkesë afatgjatë financiare do të mund të fshijnë të gjitha borxhet e tyre pas një procedure trevjeçare dhe nëse plotësojnë kushte të rrepta ligjore.

Qëllimi i reformës është të ndalojë ciklin e pafund të borxheve, ku interesat dhe detyrimet shtesë e bëjnë pothuajse të pamundur kthimin në stabilitet financiar, transmeton albinfo.ch.

Aktivistët dhe organizatat sociale e kanë përshëndetur propozimin, duke e cilësuar si një hap të rëndësishëm për njerëzit që prej shumë vitesh nuk kanë pasur një rrugë reale për të dalë nga vështirësitë ekonomike.

Sipas modelit të propozuar, personat që përfshihen në procedurë do të duhet të respektojnë kushte strikte gjatë tre viteve, përpara se të mund të përfitojnë nga falja e borxheve të mbetura. Detajet përfundimtare të zbatimit ende nuk janë bërë publike dhe reforma duhet të kalojë hapat e nevojshëm ligjorë.

Në Zvicër, dhjetëra mijëra persona përballen me probleme të vazhdueshme financiare, ndërsa organizatat sociale argumentojnë se sistemi aktual nuk u jep shumë mundësi për një fillim të ri ekonomik. Reforma synon pikërisht krijimin e kësaj mundësie të dytë.