Alarm për të nxehtin në Zvicër, net tropikale dhe temperatura deri në 36 gradë

Vera merr hov në Zvicër, temperaturat deri në 36 gradë

Meteorologët parashikojnë se moti do të mbetet kryesisht me diell gjatë fundjavës, me temperatura që luhaten rreth 26-27 gradë. Megjithatë, nga mesi i javës së ardhshme pritet një ndryshim i ndjeshëm i situatës atmosferike, transmeton albinfo.ch.

Sipas parashikimeve, një sistem i fuqishëm i presionit të lartë mbi Evropën Perëndimore dhe Qendrore do të sjellë masa të nxehta ajrore drejt Zvicrës, duke krijuar kushtet për një valë të fortë të të nxehtit.

Që nga e mërkura, temperaturat në shumë zona të vendit pritet të kalojnë kufirin e 30 gradëve, ndërsa nga e enjtja deri të paktën të hënën vlerat maksimale do të lëvizin mes 32 dhe 36 gradë Celsius.

Rajonet më të prekura nga temperaturat ekstreme pritet të jenë Valais, zona e Gjenevës, Bazeli dhe ultësirat përgjatë lumit Aare.

Megjithëse moti do të mbetet kryesisht i thatë dhe me diell, në zonat alpine, paraalpine dhe në rajonin e Jurës mund të zhvillohen stuhi të izoluara të nxehtësisë, veçanërisht gjatë fundjavës.

Meteorologët paralajmërojnë gjithashtu për net tropikale, kur temperaturat nuk zbresin nën 20 gradë Celsius. Kjo pritet të ndodhë sidomos në qytete dhe në zonat pak më të ngritura nga fundjava e ardhshme.

Për shkak të kushteve të pritshme, autoritetet federale mund të lëshojnë paralajmërime zyrtare për të nxehtin në ditët në vijim./Albinfo.ch

---