Zvicra me pishinën më të shtrenjtë në Evropë, përballet me kritika nga vizitorët

"Plazhi" milionësh në Zug përballet me valë kritikash pas rihapjes

Pas investimit prej 13 milionë frangash, shumë frekuentues të plazhit publik në Zug ankohen për ushqimin e shtrenjtë, mungesën e hijes dhe ndryshimet në pamjen e kompleksit. përcjell albinfo.ch.

Plazhi publik i qytetit të Zugut, i cilësuar shpesh si “pishina më e shtrenjtë e Evropës”, po përballet me një valë kritikash vetëm pak javë pas rihapjes së tij.

Kompleksi u rinovua me një investim prej 13 milionë frangash zvicerane dhe hapi dyert më 9 maj. Megjithatë, shumë vizitorë shprehen të zhgënjyer me rezultatin e projektit.

Ankesat kryesore lidhen me ofertën gastronomike, infrastrukturën dhe mungesën e vendeve me hije. Një vizitore, e cila kishte frekuentuar rregullisht plazhin gjatë viteve të fundit, shkroi se vendi ka humbur një pjesë të madhe të identitetit që e bënte të veçantë.

Sipas saj, menuja është reduktuar në ushqime të zakonshme dhe jo të shëndetshme, ndërsa çmimet janë tepër të larta.

“Shpenzuam 60 franga për ushqim dhe nuk u ngopëm”, ka shkruar ajo në një vlerësim online.

Vizitorët kanë kritikuar gjithashtu zonën e re për fëmijë, duke e cilësuar si një hapësirë prej betoni pa karakter, si dhe barrierën mbrojtëse kundër dallgëve, e cila sipas tyre pengon pamjen panoramike drejt liqenit dhe maleve përreth.

Pakënaqësi ka pasur edhe për mungesën e vendeve me hije. Disa vizitorë janë ankuar se pemët e mbjella rishtazi ende nuk ofrojnë mbrojtje nga dielli dhe se duhej të ishin vendosur çadra apo struktura të përkohshme.

Një tjetër kritikë ka qenë numri i kufizuar i tualeteve për gratë, me disa vizitore që raportuan pritje deri në 30 minuta.

Megjithatë, jo të gjitha reagimet kanë qenë negative. Disa frekuentues kanë vlerësuar pamjen e re të kompleksit dhe shëtitoren buzë liqenit, duke theksuar se panorama drejt maleve është mbresëlënëse.

Pavarësisht kësaj, edhe shumë prej tyre kanë shprehur pakënaqësi me restorantin dhe çmimet e ushqimeve.

Debati rreth investimit prej 13 milionë frangash kishte nisur që para fillimit të punimeve, kur disa politikanë lokalë vunë në pikëpyetje nevojën e një projekti kaq të kushtueshëm për një plazh publik. Tani, pas rihapjes, kritikat kanë kaluar nga arena politike te vetë vizitorët, të cilët kërkojnë përmirësime konkrete në shërbimet dhe infrastrukturën e kompleksit. /Albinfo.ch

---