Zvicra po kalon në recetat elektronike, mjekët do t’i lëshojnë vetëm në formë digjitale

Masa e re synon të rrisë sigurinë e pacientëve dhe të përmirësojë shkëmbimin e informacionit mes profesionistëve shëndetësorë.

Zvicra po hedh një hap të rëndësishëm drejt digjitalizimit të sistemit shëndetësor, pasi profesionistët e kujdesit shëndetësor do të detyrohen të lëshojnë recetat mjekësore vetëm në formë elektronike, përcjell albinfo.ch.

Vendimi është miratuar të enjten nga Dhoma e Kantonëve dhe do të zbatohet jo vetëm për recetat e barnave, por edhe për planet e trajtimit dhe përdorimit të medikamenteve.

Sipas autoriteteve, qëllimi kryesor i kësaj mase është të zvogëlojë rrezikun e gabimeve gjatë dhënies së barnave, si dhe të përmirësojë komunikimin dhe shkëmbimin e informacionit ndërmjet mjekëve, farmacistëve dhe ofruesve të tjerë të shërbimeve shëndetësore.

Përdorimi i recetave elektronike pritet gjithashtu të lehtësojë menaxhimin e të dhënave mjekësore dhe të rrisë efikasitetin e sistemit shëndetësor.

Megjithatë, pacientët që preferojnë dokumente fizike nuk do të mbeten pa alternativë. Autoritetet kanë sqaruar se ata do të kenë të drejtë të kërkojnë një kopje të printuar të planit të tyre elektronik të medikamenteve.

Me këtë reformë, Zvicra synon të modernizojë më tej sektorin e shëndetësisë dhe të përmirësojë sigurinë në trajtimin e pacientëve përmes përdorimit të teknologjisë digjitale./Albinfo.ch

---