Zvicra planifikon rregulla më të ashpra për dëbimin e kriminelëve të huaj

Deputetët do të shqyrtojnë një propozim që mund të lehtësojë dëbimin e shtetasve të huaj të dënuar për krime të rënda, edhe kur ata nuk kanë lidhje reale me vendin e origjinës.

Një komision parlamentar në Zvicër po propozon ndryshime në legjislacionin për dëbimin e kriminelëve të huaj, duke synuar ashpërsimin e rregullave për personat e dënuar për vepra të rënda penale, përcjell albinfo.ch.

Komisioni për Institucionet Politike i Këshillit Kombëtar vlerëson se ligji aktual është tepër i butë, pasi para se të merret vendimi për dëbim, autoritetet marrin parasysh edhe lidhjet personale që personi mund ose nuk mund të ketë me vendin e tij të origjinës.

Sipas propozimit të ri, mungesa e lidhjeve me shtetin e origjinës nuk do të merret më si faktor lehtësues në rastet e krimeve të rënda si vrasja, përdhunimi dhe lëndimet e rënda trupore.

Mbështetësit e ndryshimeve argumentojnë se personat që kryejnë krime të rënda duhet të dëbohen në vendin e shtetësisë së tyre, pavarësisht nëse kanë jetuar për një kohë të gjatë në Zvicër ose kanë lidhje të kufizuara me vendin nga vijnë.

Propozimi aktualisht ndodhet në fazën e konsultimit publik, e cila do të zgjasë deri më 2 tetor. Pas përfundimit të kësaj periudhe, autoritetet do të shqyrtojnë komentet dhe qëndrimet e palëve të interesuara përpara se çështja të procedohet më tej në Parlament.

Nëse miratohet, ndryshimi mund të ndikojë ndjeshëm në politikën zvicerane të migracionit dhe trajtimin e shtetasve të huaj të dënuar për vepra të rënda penale. /Albinfo.ch

---