Ndahet nga jeta sociologu dhe ish-deputeti zviceran, Jean Ziegler

Ai njihej edhe si mbështetës i pavarësisë së Kosovës. Merrte pjesë në demostratat që zhvilloheshin në Gjenevë nga komuniteti shqiptar i Zvicrës

Sociologu Jean Ziegler ndërroi jetë të mërkurën në moshën 92 vjeç. Gruaja e tij konfirmoi një raport nga transmetuesi zviceran në gjuhën frënge RTS për agjencinë e lajmeve Keystone-SDA.

Ziegler lindi në Bernë më 19 prill 1934. Përveç punës së tij si Këshilltar Kombëtar (deputet federal), Ziegler ishte profesor i sociologjisë në Universitetin e Gjenevës. Ai dha mësim edhe në Universitetet e Bernës, Grenoble dhe Parisit, sipas Fjalorit Historik të Zvicrës.

Si president i Grupit Parlamentar Zvicër-Botë e Tretë, Ziegler ishte një përfaqësues aktiv dhe kontrovers i popullit që zhvilloi një betejë të gjatë kundër bankave dhe lobit ekonomik në Zvicër dhe jashtë saj.

Politikani jokonvencional është i njohur edhe si përkrahës i vendosur i pavarësisë së Kosovës. Këtë e ka dëshmur, sidmos me pjesëmarrjen e tij të  shpeshtë në demostratat që zhvilloheshin në Gjenevë nga komuniteti shqiptar i Zvicrës.

Ai shkroi vepra të shumta mbi këtë temë, të cilat u përkthyen në disa gjuhë, të tilla si “Zvicra lan më bardh” (1990) dhe “Urrejtja e Perëndimit” (2009), etj. Ai shërbeu gjithsej 27 vjet në Këshillin Kombëtar për Partinë Socialdemokrate (SP).

Pas tërheqjes nga politika zvicerane, Ziegler vazhdoi karrierën dhe angazhimin e tij të gjatë ndaj vendeve në zhvillim në nivel ndërkombëtar.

Nga viti 2000 deri në vitin 2008, Ziegler ishte Raportues Special i Këshillit të të Drejtave të Njeriut të OKB-së për të Drejtën e Ushqimit. Më pas, ai ishte anëtar i Komitetit Këshillimor të Këshillit të të Drejtave të Njeriut.

---