SHBA kërkon që Kosova t’i bashkohet projektit të gazit LNG, mbështet edhe gazifikimin e qymyrit

Ambasada amerikane thekson nevojën për diversifikimin e burimeve energjetike dhe uljen e varësisë nga importet e shtrenjta të energjisë elektrike.

Shtetet e Bashkuara të Amerikës kanë përsëritur thirrjen ndaj Kosovës për t’iu bashkuar projektit të Gazit të Lëngshëm Natyror (LNG), duke e konsideruar atë si një hap të rëndësishëm drejt forcimit të sigurisë energjetike dhe diversifikimit të burimeve të energjisë në vend.

Në një përgjigje për media, Ambasada e SHBA-së në Kosovë ka bërë të ditur se Uashingtoni mbështet një qasje gjithëpërfshirëse për zhvillimin e sektorit energjetik, e cila përfshin përdorimin e teknologjisë amerikane për gazifikimin e qymyrit, shfrytëzimin e burimeve të rinovueshme dhe integrimin e Kosovës në projektin rajonal të gazit natyror të lëngshëm (LNG).

“Një gjë është e qartë: Kosova aktualisht nuk prodhon energji të mjaftueshme për të mbuluar kërkesën e brendshme”, ka deklaruar një zëdhënës i Ambasadës së SHBA-së, duke theksuar nevojën për investime dhe alternativa të reja energjetike.

Sipas Ambasadës, vendi duhet të shfrytëzojë të gjitha mundësitë në dispozicion për të përmbushur rritjen e pritshme të kërkesës për energji në vitet e ardhshme, duke rritur njëkohësisht sigurinë dhe qëndrueshmërinë e furnizimit.

“Kosova ka nevojë për të gjitha burimet e energjisë në dispozicion për të përmbushur rritjet e pritura të kërkesës në të ardhmen, për të rritur diversitetin dhe sigurinë e energjisë, si dhe për të zvogëluar varësinë nga importet e kushtueshme të energjisë elektrike”, thuhet në deklaratë.

Ambasada amerikane ka theksuar se diversifikimi energjetik nuk nënkupton zgjedhjen e një burimi në dëm të një tjetri, por krijimin e mundësive të shumta dhe të besueshme që do t’i mundësojnë Kosovës të përballojë nevojat në rritje për energji.

Kjo deklaratë vjen në një kohë kur çështja e sigurisë energjetike dhe investimeve në sektorin e energjisë mbetet ndër prioritetet kryesore të institucioneve të Kosovës, për shkak të rritjes së konsumit dhe varësisë nga importet e energjisë elektrike.

---