Pas tragjedisë në Shëngjin, ambasadori i Kosovës në Shqipëri viziton të mbijetuarit: Gjendja e tyre është stabile

Ambasadori i Kosovës në Shqipëri, Skënder Durmishi, së bashku me kryetarin e Bashkisë së Lezhës, Pjerin Ndreu, kanë vizituar mbrëmjen e sotme tre të rinjtë që i mbijetuan tragjedisë në Shëngjin.

Sipas autoriteteve, gjendja shëndetësore e të rinjve është e stabilizuar dhe ata po marrin trajtimin e nevojshëm mjekësor.

“Gjendja e tyre është e mirë, falë kujdesit të jashtëzakonshëm të personelit mjekësor dhe autoriteteve të Bashkisë së Lezhës. Ngjarja është tronditëse, sidomos duke pasur parasysh moshën e tyre. Ne jemi këtu për të parë se çfarë mund të bëjmë për ta,” deklaroi ambasadori Durmishi.

Ai shtoi se institucionet po punojnë edhe për të kontaktuar familjarët e viktimave.

“Do të bëjmë gjithçka është e mundur për të informuar familjarët e dy të rinjve që fatkeqësisht nuk mbijetuan. Ndërkohë, të mbijetuarit janë në gjendje të mirë dhe sapo i takuam e biseduam me ta. Familjarët e tyre janë duke ardhur,” u shpreh ai.

Tragjedia në Shëngjin, ku humbën jetën dy të rinj nga Kosova, mbetet një nga ngjarjet më të rënda të raportuara së fundmi në këtë zonë.