Sunny Hill zbulon performuesit e parë kryesorë për edicionin e sivjetmë

Adam Port dhe Rampa nga labeli i njohur gjerman KEINEMUSIK konfirmohen për festivalin këtë verë

Festivali Sunny Hill ka bërë të ditur emrat e parë kryesorë që do të performojnë në edicionin e sivjetmë, duke ndezur entuziazmin e fansave të muzikës elektronike, përcjell albinfo.ch.

Sipas njoftimit zyrtar, në skenën e madhe të festivalit këtë verë do të ngjiten DJ Adam Port dhe DJ/producenti Rampa, dy nga emrat më të njohur të labelit të famshëm gjerman KEINEMUSIK.

“Jemi mëse të ngazëllyer që t’u urojmë mirëseardhje Adam Portit dhe Rampës në skenën tonë”, thuhet në njoftimin e publikuar në faqen e festivalit.

Organizatorët theksuan gjithashtu se KEINEMUSIK ka krijuar një kult global ndjekësish dhe se Sunny Hill është i gatshëm të sjellë një atmosferë unike këtë verë, duke e pozicionuar festivalin edhe më fuqishëm në hartën e eventeve ndërkombëtare.

Sunny Hill pritet që në ditët në vijim të zbulojë edhe emra të tjerë të rëndësishëm të programit artistik./Albinfo.ch

---