Aeroporti i Prishtinës prezantohet në Londër

Në Passenger Terminal Expo 2026, Aeroporti Ndërkombëtar i Prishtinës “Adem Jashari” thekson angazhimin për inovacion dhe zhvillim në industrinë ajrore

Aeroporti Ndërkombëtar i Prishtinës “Adem Jashari” ka marrë pjesë këtë javë në Passenger Terminal Expo 2026 që u mbajt në Londër, një nga ngjarjet më të rëndësishme në nivel global për industrinë e aviacionit dhe menaxhimin e aeroporteve, përcjell albinfo.ch.

Në cilësinë e ekspozuesit dhe si pjesë e Limak Holding, aeroporti prezantoi zhvillimet e fundit, duke ndarë përvojat dhe duke forcuar lidhjet me liderë ndërkombëtarë të sektorit. Delegacioni u udhëhoq nga drejtori ekzekutiv Gökhan Açikgöz dhe drejtori i operacioneve Levent Kaylak.

Kjo platformë ndërkombëtare mbledh mbi 11 mijë profesionistë dhe më shumë se 400 kompani nga e gjithë bota, duke krijuar hapësira për bashkëpunim, inovacion dhe zhvillim të qëndrueshëm në industrinë e transportit ajror.

Pjesëmarrja në këtë ngjarje konsiderohet një dëshmi e qartë e përkushtimit të aeroportit për të avancuar standardet e shërbimeve aeroportuale, si dhe për të ndjekur trendet më të fundit globale në këtë sektor.

Nga shkëmbimi i ideve deri te ndërtimi i partneriteteve të reja strategjike, Aeroporti i Prishtinës vazhdon të jetë pjesë aktive e zhvillimeve që po formësojnë të ardhmen e udhëtimit ajror në nivel ndërkombëtar./Albinfo.ch

---