Filmi i Besim Ugzmajlit shpërblehet me Çmimin “Dokumentari më i Mirë” në Norvegji

“Pesë stinët e fëmijërisë sime” vlerësohet në West Nordic International Film Festival për inovacionin artistik dhe mesazhin e fuqishëm.

Filmi “Pesë stinët e fëmijërisë sime”, në regji të Besim Ugzmajlit, është shpërblyer me çmimin Dokumentari më i Mirë në edicionin e XIII të West Nordic International Film Festival, i cili u mbajt në Ålesund, Norvegji, shkruan albinfo.ch.

Sipas jurisë, filmi rikujton rëndësinë e kujtesës në një botë në ndryshim të vazhdueshëm dhe të mbushur me konflikte. Veçanërisht u vlerësua gjuha kreative e veprës, ku animacioni dhe dokumentari ndërthuren për të krijuar një univers artistik unik.

Ky sukses ndërkombëtar shënon një tjetër arritje për kinematografinë kosovare dhe konfirmon punën krijuese të regjisorit Besim Ugzmajli, duke i vendosur veprat e tij në hartën e festivalëve prestigjiozë evropianë dhe botërorë./Albinfo.ch

---