Francë–Kosovë: 5 milionë euro për mbështetje të grave dhe komuniteteve rurale

Kosova përfiton 5 milionë euro për promovimin e barazisë financiare

Ambasadori i Francës në Kosovë, Olivier Guérot, mori pjesë sot në ceremoninë e nënshkrimit të marrëveshjes për financim në vlerë prej 5 milionë eurosh ndërmjet Proparco – degë e grupit të Agence Française de Développement (AFD) – dhe Agjencioni për Financim në Kosovë (AFK), shkruan albinfo.ch.

Ky financim synon të zgjerojë qasjen në shërbime financiare për kategoritë më pak të përfshira në sistemin financiar, konkretisht:

• 3 milionë euro për gratë ndërmarrëse

• 2 milionë euro për komunitetet rurale

Instrumenti financiar pritet të kontribuojë në promovimin e përfshirjes financiare dhe në uljen e pabarazive ekonomike në vend, përmes:

• Uljes së pabarazive socio-ekonomike, duke mbështetur familjet me të ardhura të ulëta;

• Zvogëlimit të pabarazive territoriale, veçanërisht në zonat rurale;

• Zvogëlimit të pabarazive gjinore, përmes fuqizimit të grave në biznes.

Ky bashkëpunim konsiderohet një hap i rëndësishëm në forcimin e partneritetit zhvillimor ndërmjet Francës dhe Kosovës, me fokus në mbështetjen e sektorit privat dhe rritjen e barazisë ekonomike./Albinfo.ch

---