Ambasada gjermane uron Kurtin për rizgjedhjen, thekson partneritetin e fortë me Kosovën

Ambasada e Gjermanisë uron Kurtin për mandatin e ri, thekson partneritetin e ngushtë me Kosovën

Ambasada e Gjermanisë në Kosovë ka uruar Albin Kurtin për rizgjedhjen në postin e kryeministrit, duke shprehur gatishmërinë për thellimin e bashkëpunimit dypalësh në fusha të rëndësishme, përcjell albinfo.ch.

Përmes një postimi në Facebook, Ambasada gjermane ka përcjellë urimet për kreun e ekzekutivit kosovar.

“Urime për rizgjedhjen si Kryeministër, i dashur Albin Kurti”, thuhet në postim.

Sipas njoftimit, i ngarkuari me punë i Ambasadës së Gjermanisë në Kosovë, Christian Bottcher, ka përcjellë urimet e ambasadorit menjëherë pas përfundimit të seancës parlamentare për konstituimin e Kuvendit dhe formimin e Qeverisë së re.

Në deklaratë theksohet se marrëdhëniet ndërmjet Kosovës dhe Gjermanisë mbeten të ngushta dhe unike, duke shprehur gatishmërinë për thellimin e bashkëpunimit në fusha si ekonomia, siguria, politika dhe zhvillimi i qëndrueshëm.

“Duke u bazuar në marrëdhëniet e ngushta dhe unike ndërmjet Kosovës dhe Gjermanisë, presim të vazhdojmë dhe të thellojmë më tej bashkëpunimin tonë dypalësh”, thuhet në deklaratë.

Ambasada gjermane ka theksuar gjithashtu se Kosova gëzon mbështetje të fuqishme nga Gjermania, duke e cilësuar atë si një partner të fortë dhe të besueshëm.

Në fund, është shprehur gatishmëria për bashkëpunim të mëtejmë në mbështetje të integrimit euroatlantik të Kosovës, duke i uruar kryeministrit Kurti sukses në mandatin e ri qeverisës. /Albinfo.ch

---