Emigrimi pa kthim në rritje, qindra shqiptarë heqin dorë nga shtetësia çdo vit

Rritet numri i shqiptarëve që braktisin përfundimisht vendin

Shqiptarët nuk po largohen më vetëm përkohësisht nga vendi, por gjithnjë e më shpesh po zgjedhin emigrimin e përhershëm. Vetëm gjatë vitit të kaluar, rreth 900 qytetarë shqiptarë kanë hequr dorë nga shtetësia shqiptare për të përfituar pasaportën e një vendi të Bashkimit Europian apo të Australisë, përcjell albinfo.ch.

Krahasuar me vitin 2023, numri i personave që kanë marrë këtë vendim është rritur me 52 raste, ose 6.1 për qind, duke reflektuar një prirje të vazhdueshme në rritje të emigrimit pa kthim.

Sipas juristit Rafael Todhe, i cili ushtron profesionin në Gjermani, heqja dorë nga shtetësia shqiptare lidhet kryesisht me kufizimet ligjore që shumë shtete vendosin ndaj dyshtetësisë. Ai shpjegon se shumica e vendeve pritëse kërkojnë heqjen dorë nga shtetësia e mëparshme si kusht për marrjen e nënshtetësisë së re.

“Procesi i marrjes së shtetësisë është i gjatë dhe kompleks. Përparësi u jepet personave të kualifikuar dhe procedura mund të zgjasë deri në 7–8 vjet”, thekson Todhe.

Të dhënat e Ministrisë së Brendshme tregojnë se gjatë dekadës së fundit, mbi 6 mijë e 600 shqiptarë kanë hequr dorë nga pasaporta shqiptare. Shumë prej vendeve ku shqiptarët emigrojnë më së shumti, si Gjermania, Austria, Holanda dhe Spanja, nuk e lejojnë dyshtetësinë.

Ndërkohë, studiuesja e emigracionit Eldisa Cirogu vëren se arsyet që shtyjnë qytetarët drejt këtij vendimi janë kryesisht ekonomike dhe sociale. Sipas saj, tre faktorët kryesorë janë një punë më e mirë, arsim cilësor dhe shërbime shëndetësore më të avancuara.

“Marrja e shtetësisë së një vendi europian u ofron lëvizje të lirë dhe mundësi më të mëdha për të ndërtuar jetën në vende të ndryshme”, shprehet Cirogu.

Fenomeni prek veçanërisht të rinjtë. Sipas INSTAT, rreth 52 për qind e emigrantëve shqiptarë i përkasin grup-moshës 15–35 vjeç, çka përbën një sfidë serioze për zhvillimin e vendit.

“Përveç ndikimit ekonomik, Shqipëria po humb forcën aktive të punës dhe po përballet me një tkurrje demografike dhe plakje të shpejtë të popullsisë”, paralajmëron studiuesja.

Sipas të dhënave të EUROSTAT, përmasat e emigrimit janë edhe më të mëdha: në dy dekadat e fundit, mbi 521 mijë qytetarë shqiptarë kanë përfituar shtetësinë e një vendi të Bashkimit Europian, duke konfirmuar thellimin e fenomenit të emigrimit afatgjatë./Albinfo.ch 

---