Politikanët, në fjalimet e 1 Gushtit kërkojnë unitet

E përbashkëta e asaj për çfarë kanë apeluar politikanët e lartë në manifestimet në prag të 1 Gushtit ka qenë ruajtja e unitetit

Manifestimet publike për nder të festës nacionale të Zvicrës, 1 Gushtit, në disa lokalitete kanë filluar një ditë më parë. Në to kanë marrë pjesë edhe politikanë të lartë si ministra federalë, kryetarë partish etj.

E përbashkëta e asaj për çfarë kanë apeluar folësit në këto manifestime ka qenë ruajtja e unitetit.

Ministri i Punëve të Jashtme, Didier Burkhalter në një fjalë të mbajtur në Sumiswald të Kantonit të Bernës ka thënë se Zvicra si shtet është një projekt i përbashkët. Zvicra është e aftë të realizojë përparime të përbashkëta dhe tu qëndrojë edhe kohëve të vështira.

Ai më tutje ka shprehur dëshirën që “Zvicra të mbetet gjithmonë e bukur siç është në Sumiswald”, lokalitet ky në regjionin Emmental që është komuna e prejardhjes së tij të largët. Paraardhësit e tij ishin shpërngulur para 400 vitesh në Neuchatel por rrënjët e familjes së tij mbeten gjithmonë në Emmental ka thënë veç tjerash Burkhalter.

Ndërsa ministri tjetër në Qeverinë e Zvicrës, ai për punë të brendshme, Alain Berset për këtë festë kishte zgjedhur lokalitetin Lindau në Kantonin e Cyrihut. Ai ka thënë se po jetojmë në kohë të pasigurta dhe i është referuar problemeve si forcimi i frangut, kriza e borxheve dhe ajo e refugjatëve. Por, ka shtuar Berset, ashtu sikurse Julius Maggi në kohën e tij, edhe Zvicra sot duhet t`i parashtrojë disa pyetje. Me këtë rast ai i është referuar Maggi-t, personit që ka zbuluar kubëzat e supës dhe fabrika e parë e tij është ngritur në këtë komunë.

Ndërsa kryetari i SVP-së, Toni Brunner në fjalën e tij të mbajtur në Hausen të Brugg-ut, Kantoni Aargau është marrë me domosdonë e jetësimit të vendimeve që merren nga vota e drejtpërdrejtë e popullit. “Ne duam të vendosim mbi ardhmërinë tonë. Në Zvicrën e demokracisë direkte duhet që të gjithë të kenë të drejtë të flasin për rë gjitha, edhe për migracionin dhe azilin”, ka shtuar Brunner.