Vërshimet në Kosovë: Kurti dhe ekipet qeveritare në terren, situata nën kontroll

Kryeministri Kurti: Situata nga vërshimet nën kontroll, ekipe në terren për evakuim dhe ndihmë

Kryeministri Albin Kurti njofton se ekipet e Ministrisë së Punëve të Brendshme dhe Ministrisë së Mjedisit, Planifikimit Hapësinor dhe Infrastrukturës kanë qëndruar dje dhe gjatë natës në terren për të monitoruar situatën e rënduar nga vërshimet dhe për të asistuar në evakuimin e banorëve nga zonat më të rrezikuara, përcjell albinfo.ch.

Ministrat Xhelal Sveçla, Hysen Durmishi dhe Elbert Krasniqi kanë qenë në kontakt të vazhdueshëm me kryetarët e komunave më të prekura, ndërsa Forca e Sigurisë së Kosovës ka mbajtur njësitet e saj në gatishmëri dhe ka asistuar vendosjen e familjeve të rrezikuara, veçanërisht në Gjakovë.

Sipas raporteve të Agjencisë së Menaxhimit Emergjent, komunat më të prekura përfshijnë Fushë Kosovën, Lipjanin, Obiliqin, Drenasin, Podujevën, Shtimjen, Graçanicën, Gjakovën, Prizrenin, Suharekën, Malishevën, Rahovecin, Mamushën, Dragashin, Mitrovicën, Vushtrrinë, Skenderajn, Klinën, Istogun, Junikun, Deçanin dhe Pejën.

Aktualisht, situata raportohet të jetë nën kontroll. Përveç dëmeve materiale, fatmirësisht nuk ka pasur lëndime serioze. Gjatë natës janë ndërhyrë në zona me rrëshqitje dhe bllokime të puseteve, ndërsa kompanitë përgjegjëse mbeten në gatishmëri.

Kryeministri Kurti falënderoi ekipet operative, zjarrfikësit dhe institucionet e sigurisë për reagimin e shpejtë, si dhe qytetarët për solidaritetin dhe bashkëpunimin. Ai u bëri thirrje qytetarëve të ndjekin udhëzimet e institucioneve deri në tejkalimin e plotë të situatës.

---