Kosovë: Shtyhet fillimi i mësimit për shkak të motit të keq, MAShTI njofton datën e re

(KEYSTONE/Salvatore Di Nolfi)

Ministria e Arsimit, Shkencës, Teknologjisë dhe Inovacionit (MAShTI) ka njoftuar se fillimi i procesit mësimor për gjysmëvjetorin e dytë do të shtyhet deri më 12 janar 2026, për shkak të reshjeve të shumta dhe kushteve të vështira në disa zona të vendit.

Ministria ka vendosur që pushimi dimëror të vazhdojë edhe më 8 dhe 9 janar, pasi reshjet e pritura sipas Institutit Hidrometeorologjik të Kosovës (IHMK) mund të shkaktojnë vërshime lokale, probleme në komunikacion dhe pengesa në trafik.

MAShTI thekson se orët e humbura mësimore gjatë këtyre ditëve do të zëvendësohen gjatë pjesës së dytë të vitit shkollor 2025/2026, dhe rithekson se siguria e nxënësve dhe e stafit arsimor mbetet prioritet kryesor, transmeton albinfo.ch.

Ministria falënderon prindërit, nxënësit dhe mësimdhënësit për mirëkuptimin dhe bashkëpunimin.