Guy Parmelin zgjidhet president i ri i Zvicrës me 203 vota – rezultat rekord

(KEYSTONE/Gaetan Bally)

Gjatë sesionit dimëror, Parlamenti zviceran po shqyrton buxhetin për vitin 2026 dhe po zhvillon zgjedhjet për Presidiumin Federal. Në rend dite janë gjithashtu iniciativa “Jo një Zvicër me 10 milionë banorë” si dhe iniciativa kundër fishekzjarreve.

Në këtë kuadër, Guy Parmelin është zgjedhur President i ri i Konfederatës Zvicerane, duke marrë 203 vota, një rezultat i jashtëzakonshëm dhe më i miri i 25 viteve të fundit, shkruan albinfo.ch.

Për krahasim, vitin e kaluar Karin Keller-Sutter kishte marrë 168 vota, ndërsa në vitin 2019 Ueli Maurer kishte arritur 201 vota – rekord që tani tejkalohet nga Parmelin.

Vlerësim për ministrin e Ekonomisë

Rezultati i lartë shihet edhe si shenjë vlerësimi për punën e Parmelin si ministër i Ekonomisë. Kohët e fundit ai njoftoi arritjen e një marrëveshjeje për tarifat doganore me Shtetet e Bashkuara të Amerikës, një zhvillim i rëndësishëm për ekonominë zvicerane.

Megjithatë, Parmelin është përballur edhe me kritika, sidomos lidhur me komunikimin rreth vizitës së disa milionerëve në Shtëpinë e Bardhë.

Tradita e radhës dhe “dëshmia” parlamentare

Zgjedhja e presidentit federal zakonisht ndjek një rotacion të brendshëm dhe konsiderohet formalitet. Megjithatë, rezultati i votimit shpesh shihet si një lloj “dëftese” për punën e anëtarëve të Këshillit Federal.

Në mandatin e tij të parë si president, në vitin 2021, Parmelin kishte marrë 188 vota – edhe atëherë një rezultat i mirë, por jo aq i lartë sa këtë vit.

Zgjedhja e nënkryetarit

Pas zgjedhjes së Guy Parmelin si president, pritet që Ignazio Cassis të zgjidhet nënkryetar i Këshillit Federal. Më pas, Parmelin do t’i drejtohet Parlamentit me një fjalim të shkurtër.