Rolfes zbulon arsyet e largimit të Xhakës nga Leverkuseni: Ishte koha për diçka të re

E vërteta e largimit të Xhakës nga Leverkuseni

Drejtori sportiv i Bayer Leverkusenit, Simon Rolfes, ka folur hapur në emisionin televiziv “Sky90” për largimin e Granit Xhakës nga klubi gjerman, përcjell albinfo.ch.

“Graniti është në formë të shkëlqyer, si fizikisht ashtu edhe mendërisht. Është një lojtar i jashtëzakonshëm. Ai kishte edhe tre vjet kontratë me ne dhe kjo nuk ishte kontratë e keqe. Por ne kemi disa parime mbi të cilat mbështetemi”, deklaroi Rolfes.

Sipas tij, kërkesat financiare të Xhakës kanë qenë më të larta sesa ajo që klubi ishte i gatshëm të ofronte.

“Në një moment e bëmë të qartë: kjo nuk po funksionon. Ne kemi kufizime financiare dhe kontrata që duhen respektuar. Edhe lojtari duhet t’u përmbahet tyre, përndryshe do të vijnë dhjetë lojtarë të tjerë me të njëjtat kërkesa”, shtoi ai.

Në fund, të dyja palët vendosën se ndarja ishte zgjidhja më e mirë, pavarësisht trofeve të fituara: titullit kampion, Kupës dhe Superkupës, ku Xhaka pati rol vendimtar.

Kapiteni i Zvicrës iu bashkua ekipit të rikthyer në Premier League, Sunderland, për rreth 15 milionë euro, duke nënshkruar kontratë deri në vitin 2028.

Ndikimi i tij në klubin anglez ka qenë i menjëhershëm. Sunderlandi aktualisht renditet në pozitën e tetë, ndërsa Xhaka ka luajtur pothuajse çdo minutë, duke u zëvendësuar vetëm pas minutës së 75-të në humbjen 3:0 ndaj Manchester Cityt fundjavën e kaluar. Ai tashmë ka shënuar një gol dhe ka dhënë katër asistime.

Leverkuseni ka ndier mungesën e tij në aspektin sportiv, por Rolfes thekson se vendimi ishte i domosdoshëm:

“Ishte momenti i duhur për t’u përqendruar në diçka të re”.

Ndërkohë, me ardhjen e Alex Garcia, Leverkuseni beson se ka gjetur pasardhësin ideal të Xhakës.

---