Portugali: Kosova shpalosi potencialin digjital në Panairin “Web Summit 2025”

Dhjetë kompani nga Kosova të sektorit të TIK-ut u prezantuan në Panairin “Web Summit 2025” në Portugali

Dhjetë kompani kosovare të sektorit të TIK-ut u përfaqësuan këtë javë në Panairin “Web Summit 2025”, i cili u mbajt nga 10–13 nëntor në Lisbonë të Portugalisë, transmeton albinfo.ch.

Pjesëmarrja e tyre u mundësua nga Ministria e Industrisë, Ndërmarrësisë dhe Tregtisë, përmes KIESA-s, duke u krijuar mundësi kompanive të prezantojnë produkte dhe zgjidhje inovative në një nga ngjarjet më të mëdha globale të teknologjisë.

Kompanitë pjesëmarrëse ishin: Global CT Digital Kosovo, Kubit Solution, Innovation Academy, Saint Pearl, Appbites, Kreahub, Shkolla Digjitale, Pretera, TDS Consulting dhe Bambus.

Shtandin e Kosovës e vizitoi edhe Ambasadorja e Kosovës në Portugali, Edona Maloku Berdyna, e cila u ofroi mbështetje përfaqësuesve të kompanive dhe theksoi rëndësinë e prezencës së Kosovës në skenën ndërkombëtare.

Pjesëmarrja në “Web Summit 2025” shënoi një hap të rëndësishëm për promovimin e ekosistemit digjital të Kosovës dhe për krijimin e mundësive të reja për bashkëpunim me partnerë dhe investitorë globalë.

---