Dy asistime të Xherdan Shaqirit në fitoren e Baselit ndaj Zurichut

Shaqiri shkëlqen në Superligën zvicerane, Baseli fiton derbin ndaj Zurichut

Ylli i futbollit shqiptar, Xherdan Shaqiri po vazhdon të shkëlqejë në kampionatin zviceran.

Në derbin e zhvilluar të mërkurën mbrëma, mes Baselit dhe Zurichut, ai u bë protagonist kryesor duke regjistruar dy asistime në fitoren 2:0 të skuadrës së tij, transmeton albinfo.ch.

Ndeshja u zhvillua në kuadër të xhiros së 11-të të Superligës së Zvicrës, ku Baseli konfirmoi formën e mirë të javëve të fundit. Me këtë triumf, skuadra e Shaqirit ngjitet në vendin e tretë me 21 pikë, ndërsa Zurichu mbetet me 13 pikë në renditje.

Shaqiri u aktivizua deri në minutën e 89-të, duke dhënë një tjetër paraqitje të nivelit të lartë dhe duke e çuar bilancin personal në pesë gola dhe shtatë asistime këtë sezon.

Nga ana tjetër, Albian Ajeti u zëvendësua pas pjesës së parë, ndërsa te Zurichu Lindrit Kamberi u largua nga loja në minutën e 89-të. Në 20 minutat e fundit, në fushë u aktivizua edhe Bledian Krasniqi, i cili solli energji në mesfushë për skuadrën mysafire.

---