Call Center, punëdhënësit më të mëdhenj në Shqipëri

Nuk ka krizë ekonomike për industrinë e shërbimit online te qendrave të telefonisë në Shqipëri

Në total, nga rreth 300 kompani call center vlerësohet se numri i të punësuarve i kalon 20 mijë.

Kompanitë call center janë bërë punëdhënësit më të mëdhenj në vend, duke qenë një zgjidhje e mirë për ekonominë.

Të dhënat e fundit të sektorit tregojnë se bizneset “call center”  shpejt do të tejkalojnë për nga numri i të punësuarve edhe industrinë për përpunimin e pjesshëm të veshjeve dhe këpucëve .

Çdo ditë në rrugët e Tiranës, ku është përqendrimi më i madh, shfaqen reklama kompanish të reja, që reklamojnë qindra vende pune.

Në përgjigje të kërkesës së lartë, qendrat e mësimit të gjuhëve të huaja tashmë po ofrojnë kurse të gjuhës italiane, të specializuara për call center.

Të dhënat e fundit të tatimeve raportojnë gati 10 mijë të punësuar në vetëm 12 kompani call center.

Por, specialistët e rekrutimit të punonjësve mendojnë se me shifrat jozyrtare, call center është biznesi i parë punëdhënës në vend, ku dinamika e punës edhe për periudha të shkurtra 1-3 muaj, (veçanërisht në sezonin e verës) bën që një pjesë e të rinjve që nuk e tejkalojnë këtë kohë, të mos rezultojnë në listat e kontributeve shoqërore.

Nga ana tjetër, sipërmarrësit e call center nuk kanë hasur ende vështirësi në rekrutimin e të rinjve të aftë për ta bërë këtë punë.

Mjafton një trajnim një apo dyjavor dhe puna 6-8 orë siguron minimalisht 300 euro. Në total, nga rreth 300 kompani call center vlerësohet se numri i të punësuarve i kalon 20 mijë.

/Monitor/